Монголын нийт боловсон хүчин 3200 гаруй инженер технологичдоор хүрээгээ тэллээ. Тэд бол ШУТИС-ын 2009-2010 оны хаврын улирлын төгсөлтөөр шинэхэн диплом, ромбоо гардан авсан залуу мэргэжилтнүүд юм. Өчигдөр ШУТИС 64 дэх удаагийн төгсөгчдөдөө ромбо, дипломыг нь гардуулах ёслол боллоо. Төгсөлтийн ёслолыг ШУТИС-ийн ректор Б.Дамдинсүрэн нээн үг хэлж, проректорууд болон бүрэлдэхүүн 13 сургуулийн захирал төгсөгчиддөө баяр хүргэхээр ирсэн байв. Мөн УИХ-ын гишүүн, ШУТИС-ийн удардах зөвлөлийн гишүүн Ч.Улаан болон ХХААХҮЯ-ын газрын дарга Ч.Бадарч нар баярт хүрэлцэн ирсэн. Энэ удаагийн хаврын улиралын төгсөлтөөр ШУТИС-ийг магистрын зэрэгтэй 251, бакалаврын зэргийн дипломтой 1769, мэргэжлийн дипломтой 117 оюутан төгсчээ. Үүнээс сурлага хөдөлмөрөөрөө бусдыгаа манлайлж онцлох дипломтой төгссөн 80 оюутан байна.
